Barbón cree que la reconocencia de la Unesco cola cultura sidrera "fai xusticia"

Otea cree que la reconocencia a la sidra asitia a Asturies como "destín únicu"

El presidente del Principáu, Adrián Barbón, afirmó esti miércoles que la reconocencia de la cultura sidrera asturiana como Patrimoniu Cultural Inmaterial de la Humanidá por parte de la Unesco "fai xusticia" cola “memoria" de los asturianos, y tien de ser amás "un golpe d'autoestima".

Asina s'espresó énte los medios de comunicación nel Muséu de la Sidra allugáu na villa asturiana de Nava, dende onde siguió en directo la valoración de Comité Intergubernamental de la Unesco pa la Salvaguardia del Patrimoniu Cultural Inmaterial que dio la so reconocencia a la cultura sidrera asturiana.

Barbón, quien dixo tener "la emoción a flor de piel" en "un sentimiento” compartíu “por tolos asturianos", recordó a aquellos que tresmitieron esa cultura "xeneración tres xeneración" porque ensin ellos güei nun sedría parte de la “identidá" de los asturianos.